Home அழகப்பா பல்கலைக்கழகம் இரண்டு நாள் தேசிய கருத்தரங்கு

இரண்டு நாள் தேசிய கருத்தரங்கு

42
0

இரண்டு நாள் தேசிய கருத்தரங்கு

“கீழை மற்றும் மேலை நாடுகளின் திறனாய்வுக் கோட்பாடுகளும், திறனாய்வில் அவற்றின் பயன்பாடுகளும்” என்ற தலைப்பில் இரண்டு நாள் தேசிய கருத்தரங்கு டிசம்பர் 17 மற்றும் 18-ஆம் தேதிகளில் காரைக்குடி அழகப்பா பல்கலைக்கழகத்தில் ஆங்கிலம் மற்றும் அயல்நாட்டு மொழிகள் துறை சார்பாக நடைபெற்றது.

அழகப்பா பல்கலைக்கழக துணைவேந்தர் பேரா.நா.இராஜேந்திரன் கருத்தரங்கினைத் தொடங்கி வைத்து உரையாற்றினார். அவர் தனது உரையில் விமர்சனத்தின் முக்கியம் குறித்துப் பேசும் போது, திறனாய்வாளர்களே ஒரு புத்தகத்திற்கு உயிரூட்டி அதனைப் பிரபலப்படுத்துகிறார்கள் என்றார். விமர்சனங்கள் இல்லை என்றால் புத்தகங்கள் இல்லை என்றும், விமர்சனம் என்பது ஒரு மனிதனுக்கு சுவாசம் எவ்வளவு முக்கியமோ அவ்வளவு முக்கியம் என்றும் குறிப்பிட்டார். ஒரு சமுதாயத்தின் கலாச்சார பெருமைகளையும், வாழ்வியல் தத்துவங்களையும் உலகிற்கு உணர்த்துவது இலக்கியத்தின் சிறப்பு. இலக்கியத்தின் அற்புதத்தையும், அழகையும் சுவைபட உலகிற்கு எடுத்துக் காட்டுவதே திறனாய்வின் நோக்கமாக இருந்து வருகிறது. இலக்கியத்திலிருந்து இலக்கியக் கோட்பாடுகளும், கொள்கைகளும் வகுக்கப்பட்டுள்ளன. கீழை மற்றும மேலை நாடுகளின் இலக்கியக் கோட்பாடுகளை பயன்படுத்தி இலக்கியத்தின் உன்னதத்தை உலகிற்கு பறைசாற்றுவதாலும், வெளிப்படுத்துவதாலும் விமர்சனங்கள் என்றும் வரவேற்க்கப்படுகின்றன என்று கூறினார்.

திருச்சி, பாரதிதாசன் பல்கலைக்கழக மேனாள் ஆங்கிலத்துறை பேராசிரியர் கா.செல்லப்பன் தனது சிறப்புரையில் இலக்கியம் என்பது தங்குதடையின்றி எப்பொழுதும் வளர்ந்து வரும் நிகழ்வு என்றும், அதில் பொதிந்துள்ள அழகையும், கருத்துக்களையும், அமைப்பையும் உலகிற்கு பறைசாற்றுபவை அவை பற்றிய விமர்சனங்களே என்றார். இலக்கியமும், அது பற்றிய திறனாய்வும் ஒரு நாணயத்தின் இரு பக்கங்கள் போன்றவை என்றும் குறிப்பிட்டார். சங்க இலக்கிய பாடல்களை மேலை நாட்டு இலக்கிய திறனாய்வுக் கொள்கைகளை பயன்படுத்தி அவற்றின் சிறப்பு குறித்து விளக்கினார். சிலப்பதிகாரத்தில் புகார் காண்டத்தில் வெகுண்டெழுந்து பேசும் கண்ணகியின் பேச்சு பெண்ணியத்தின் உச்சக்கட்ட வெளிப்பாடு என்றார். பாரதியாரின் காணி நிலம் வேண்டும் என்ற பாடலில் பொதிந்துள்ள அழகையும், கருத்துக்களையும் மேலை நாட்டு விமர்சன அணுகுமுறைகளை பயன்படுத்தி விளக்கிப் பேசினார். பரத முனியின் நாட்டியசாஸ்திரத்திலுள்ள ரசா கோட்பாட்டையும், அதன் சிறப்பையும் குறிப்பிட்டார்.

சிறந்த ஆராய்ச்சி கட்டுரைகள் அடங்கிய ஓர் ஆய்வுக்கோவையை துணைவேந்தர் பேரா.நா.இராஜேந்திரன் வெளியிட அதன் முதல் பிரதியை பேரா.கா.செல்லப்பன் பெற்றுக் கொண்டார். முன்னதாக ஆங்கிலத்துறைத் தலைவர் (பொ) பி.மதன் இக்கருத்தரங்கின் நோக்கம் குறித்து பேசினார். இலக்கியம் என்பது மௌனத்தன்மை கொண்டது என்றும், அதன் விமர்சனம் மட்டுமே அதைப்பற்றி பேசுகிறது என்றும் சாதாரண வாசகர்களால் உணர முடியாத ஆழந்த கருத்துக்களை விமர்சனங்கள் எளிதாக வெளிக்கொணர்கின்றன என்றும், ஒரு விசாலாமான திறனாய்வுப் பார்வைக்கு மேலை மற்றும் கீழை நாடுகளின் விமர்சனக் கோட்பாடுகள் பெரிதும் உதவுகின்றன என்றார். வாராங்கல் தேசிய தொழில்நுட்ப கழக பேராசிரியர்.கேசவ ராவ் சிறப்புரை ஆற்றினார். ஆங்கிலத்துறை உதவி பேராசிரியர்.முனைவர்.கனிமொழி நன்றியுரை ஆற்றினார்.

இந்த இரண்டு நாள் கருத்தரங்கின் நிறைவு விழாவில் பல்கலைக்கழக பதிவாளர் பேரா.ஹா.குருமல்லேஷ் பிரபு தலைமை வகித்தார். மத்திய செம்மொழி ஆராய்ச்சி நிறுவனத்தின் முக்கிய உறுப்பினரும் பாண்டிசேரி மத்திய பல்கலைக்கழகத்தின் மேனாள் ஆங்கிலத்துறைத் தலைவருமான பேரா.பி.மருதநாயகம் நிறைவு உரை ஆற்றினார். தார்வாட் பல்கலைக்கழக பேராசிரியர் மல்லிகார்ஜூன பாட்டில் மற்றும் தென்னிந்திய ஆங்கில ஆராய்ச்சி கழக மேனாள் பேராசிரியர். எஸ்.வெங்கடடேஸ்வரன் ஆகியோர் சிறப்புரை ஆற்றினார்கள். ஆங்கிலத்துறை உதவி பேராசிரியர் முனைவர். மு.நடராஜன் நன்றி கூறினார். 250-க்கும் மேற்பட்ட பேராசிரியர்களும், ஆராய்ச்சி மாணவர்களும் மற்றும் முதுகலை மாணவர்களும் இக்கருத்தரங்கில் கலந்து கொண்டனர்.

 

 

 

LEAVE A REPLY

Please enter your comment!
Please enter your name here